موال بلدي للثورة !!
كتبته في الثلاثين من يناير 2011 م
********
من كام سنة يا بلدنا وانتي شايله الهمْ
شايفَه وساكته وصابره ع المرار والغـمْ
ولما طــــــال صبرنا ع الظـــــلم وتعبنا
قاموا شباب البلد جـرُّوا ف عروقنا الدمْ
********
فساد ومالـــــي البـــلد كنا بنتنفسه
بيعلموه للـــــــولاد وأساتذة بتدرسه
لو نقطه منه اترمت في البـــحر يتعكر
ولو غبارُه طـلِع في الجــــــــو هيلوثه
******
شوف كام سنه م العجاف والأرض بتشقق
ولا سحـــاب في السما ولا طيرة بتزقزق
ولما قام الرجـــــــــال بالثورة ع الظالمين
لبى الزمان أمــــــــــرهم وطلبهم اتحقق
******
آدي الشباب اللي يفرح قومي يا بهيه
طلي عليه م الميدان غنـــي له غِنيه
وزغرتي وافرحي يا أصيلة بــــــولادك
هيخللوا بكرة اللي جايلك كله حــريه
*******
قومي بقى يا بلدنا واصحي من نومك
ابنك بينده عليكي شمَّــــري هدومك
كفايه نوم فـــي العسل ورينا كراماتك
وبيِّني همتك يوم الميدان يــــــــومك
*******
قال الشباب كلمته وما خافش م الجلاد
وكتب لنا بثورته صفـــــحة من الأمجاد
رجَّع كرامة الوطــــــن ورفع رايتنا لفوق
من يوم ما ثار الشباب وبلادنا في أعياد
********
ألفين سلام يا شبابنا إيدي على إيدك
من يوم ورايح لا فيه عبدك ولا سـيدك
وان كانوا نسُّوك يا غالي فرحــة الأعياد
خمسة وعشرين يناير هوَّا يو م عيدك
*******
الشعب قال كلمته يوم وقفة التحــرير
وحلف بشرفه وتاريخـه ان كلامه يصير
ما تتعبوش نفسكم يا تنابلة السلطان
ما هيرجــــــع الحر داره الا مـع التغيير
*******
المصري ثار ثورته اشـــــــهد عليه يا زمان
شوف عـــــــزته وقوته بتزلزل الطـــــغيان
صبحـــــــت هنا كلمته هيَّ اللي بتجلجل
والظلم اهي دولته يا سادة كان يا ما كان !
*******
شمَّـــــــــر إيديك يا ولد واطلع مع الثوار
لبِّـــــــــــــــي نداء البلد وانضم للأحرار
حــــــــــرية الأرض غالية ومهرها غالي
والضـــــــلمه بينــوروها من حرايق النار
*****
مين كان يصــــدق بإن الشعب يوم هيثور
ويلف في الدنيا صـــــوته م الميدان ويدور
مين كان يقول ان شمس العدل راح تطلع
وتملا أرض الكـــــــــــــنانة بالأمل والنور ؟؟!!
******
الثورة مش معجزة عايزة رسول م السما
ولا هـــــــــيَّ حلم وأغاني وأمنيات إنما
الثورة بركـــــــــان غضب بيفجر الأوطان
وتخش بيه التاريـــــــخ فايزة ومتحكمه
******
الثورة حـــــــــلم الشعوب بالعالم الأجمل
مشوار بَــــــــداه الشباب ولا بد راح يكمل
إن موِّتوا عنترة بكـــــــــرة هييجي ابو زيد
وان داســـوا ورد الجناين ريحته راح تفضل !!
ــــــــــــــــــــــــ
د. شعبان عبد الجيِّد